نشرت الإعلامية ريهام سعيد. فيديو عبر صفحتها الرسمية على  "فيسبوك" تعلق من خلاله على قرار وقفها عن الظهور الإعلامى على خلفية التصريحات التى أدلت بها حول مرضى السمنة.

وقالت ريهام: "بما إن هناك حملة ممنهجة من خلال المواقع اللى بتنزل كل ٣ دقائق حاجة من الصبح تقوّم بيها الناس على. فمجرد أن يقرأ أحد أننى أهنت الناس البدينة ومرضى السمنة. وبما إننا شعب بيكسل يقرأ ويشوف. فبيصدق على طول ويزيط مع الزيطة ومش مهم بقى الست دى حالها وعيالها.. مش مهم بقى.. مش مهم نكذب ونصدق الكذبة.. المهم إن أى حد ساهم فى وقفي النهارده من الصحفيين والمواقع هم ناس بتكذب لأنى مقلتش ولا حاجة.. والله العظيم ما قلت ولا حاجة.. كل الناس اللى بتكتب تعليقات تحت الأخبار فى المواقع واضح إنها سامعة وحافظة مش فاهمة".

وتابعت: "مفيش حد شاف الحلقة. مفيش حد شاف أنا قلت إيه. كل الناس بتردد لبعض كلام أنا ما قلتوش.. كل اللى قلته إن التخين شكله مش حلو ومش قادر يمشي على رجليه وعايش ميت.. فى واحدة كاتبة إنى قلت ملهوش حق فى الحياة. وناس تقول إنى أهنتهم.. لكن كلمة عايشين ميتين دى هم اللى قالوهالى. وبتكلم على الناس اللى فوق الـ٢٠٠ و٢٥٠ كيلو".

وواصلت: "أنا بعتذر لكل الناس اللى زعلت منى عن سوء فهم لأنى لم أقصد إنى أهين أى حد.. ومش بعتذر عشان أرجع للشاشة تانى أنا خلاص مش هشتغل فى الإعلام تانى ولا التمثيل تانى لأن أخطر حاجة على مريض السمنة وكل حاجة هو الضغط. وأنا بقالى ١٦ سنة مضغوطة".

واستطردت ريهام: "جاء الوقت اللى أرتاح فيه وأقعد مع أولادى وأخلى بالي منهم. وأقعد مع جوزى ونقرب من ربنا.. ١٦ سنة بخدم الناس بس ونايمة بفكر مين عايز فلوس.. مين عايز كيس دم. ومعملتش فلوس وكانت نيتى خالصة لله- سبحانه وتعالى- عمرى ما تربحت مرة ولا أخدت فلوس مرة.. عشت بضمير حى وراس مرفوعة".

وأكملت ريهام قائلة: "الناس اللى بتقول أنا غلطت كام مرة.. أنا عمرى ما غلطت ولا مرة.. لكن عشان ببقى ناجحة قوى ومسمعة قوى بتحارب. زى الواحدة اللى راحت أجرت لى واحدة وخدوا فلوس قد كده وتطوير واترميت في السجن ٤٥ يوم ظلم.. لو أرجل راجل فى الدنيا ميستحملش اللى استحملته نصف ساعة.. أنا اتبهدلت واتظلمت.. أنا عايزة أعيش حياتى كويس.. أنتم خدمتونى النهاردة. كل واحد علق تعليق مش كويس. واللى ألّف تأليفة أنا ما قلتهاش. لأنكم فوقتونى وعرفتونى إنى لازم أعيش لنفسى وأولادى.. كفاية كده".

وأضافت: "كفاية بهدلة بقا.. الواحد لازم يعيش بكرامة. وإحساس الظلم ده وحش قوى. كفاية بقا تعبت. خلاص بقا".

ووجهت رسالة للكابتن منتخب مصر السابق أحمد حسن قائلة: "كابتن أحمد حسن مامتك زى القمر وكل حاجة محدش قال إنها مش زى القمر. لكن واضح إنك ماتفرجتش على الحلقة أنت كمان وزيطت مع الزيطة وهيصت مع الهيصة.. هى زى القمر وممكن تبقى زى القمر أكتر لو خست.. مينفعش تشجعها على إنها تبقى تخينة عشان الضغط والكوليسترول ورجلها مش هتقدر تمشى عليها ونفسها تقيل. اسألها هى. هو ده اللى أنا كنت عايزة أغيره".

وواصلت:" بيقولوا أنتم حلوين وزى القمر كده. لكن ده غلط لأنه بيتعبهم. أنا كنت منهم لكن كنت بعالجهم. لازم يمشوا صح ويحبوا الحياة وينعموا بالنعم اللى ربنا أداهالهم لأن التخت بيموتها عندهم".

وقالت: "أنا ما قلتش حاجة عن التخان. كل ده تأليف وظلم بس انتم خدمتونى وأنا مش راجعة تانى أنا اتوقفت ٣٠ مرة. وأول مرة أقول كده.. أنا مش راجعة تانى. لأن عندى حاجات اهم أعملها.. ربنا وبعدين ولادى.. بشكركم جدا كل واحد ساهم فى وقفى. بشكر جمهورى اللى هيفضل يدعيلى طول عمره. هتوحشونى وانتم عارفين أنا عملت ايه وده يكفى".

واختتمت: "كل الناس اللى بتدخل على المواقع من غير ما تشوف يقولها بلاش تقطع فى..ولا أقولك قطّع أنا محتاجة حسنات أكتر وأكتر".